Səudiyyə Ərəbistanı
Krallığı ABŞ prezidenti Donald Trumpın İran və onun aqressiv kursuna
qarşı yürütdüyü qətiyyətli strategiyanı dəstəkləyir və bu mövzuda onun
görüşlərini yüksək dəyərləndirərək, ümumi çağırışlar, xüsusilə də,
İranın regionda yeritdiyi siyasət və təcavüzkar hərəkətlərinin
qarşısının alınması üçün Amerika Birləşmiş Ştatlarının bölgədəki
müttəfiqləri ilə birgə fəaliyyət göstərəcək.
Bu barədə Səudiyyə Ərəbistanının Bakıdakı səfirliyindən bildirilib.
Qeyd edilib ki, Səudiyyə Ərəbistanı Krallığı regionumuz və dünyada kütləvi qırğın silahlarının yayılmasının qarşısının alınması zərurətinə inanaraq, bundan öncə İran və 5 + 1 dövlətləri arasında nüvə sazişini dəstəkləyib və bunun İranın
nüvə silahı əldə etməsinin hər hansı formada qarşısının alınmasına
gətirib çıxaracağını, sülh və təhlükəsizliyə nail olunacağına ümid edib.
"Lakin İran
sanksiyaların qaldırılması nəticəsində yaranan iqtisadi gəlirdən
istifadə edərək, ondan regionun sabitliyini pozmağı davam etdırmək üçün
istifadə etmiş, xüsusilə öz ballistik raket proqramını inkişafı
etdirmiş, terrorizmə o cümlədən Hizbullah və Husi yaraqlılarına dəstək
vermişdir. İran
bununla da kifayətlənməyərək, beynəlxalq qərarları açıq və kobud
şəkildə pozaraq, bu potensialı və təcrübələri ona tabe olan yaraqlılara
ötürmüş, Husi yaraqlıları isə bu raketlərdən Krallığı hədəfə almaq üçün
istifadə etmişlər. Göstərilən faktlar, İranın öz müdafiə potensialını inkişaf etdirməsi ilə bağlı olan iddialarının saxtalığını sübut edir. İran
öz təcavüzkar kursunu davam etdirərək Qırmızı dəniz və Ərəb
körfəzindəki beynəlxalq dəniz koridorlarını İnqilabı Keşikçiləri və Husi
yaraqlıları vasitəsilə davamlı hədəfə almış, Səudiyyə Ərəbistanı və region dövlətlərinə qarşı kiber hücumları davam etdirib.
Bundan çıxış edərək, Krallıq Amerika Birləşmiş Ştatlarının Prezidenti tərəfindən elan edilmiş arzuedilən məqsədlərə çatmaq, İranın yürütdüyü siyasətin beynəlxalq təhlükəsizlik və sülhə yaratdığı təhlükənin aradan qaldırılması üçün ABŞ
və beynəlxalq ictimaiyyətdə olan tərəfdaşları ilə işləməkdə davam
edəcəyini vurğulayır. Belə ki, görüləcək iş yalnız onun nüvə proqramı
ilə məhdudlaşmır, geniş mənada onun bütün təcavüzkarlıq fəaliyyətini
əhatə edir, İranın kütləvi qırğın silahları əldə etməsi üçün bütün yolların kəsilməsi məqsədini güdür" - deyə Səudiyyə Ərəbistanının Bakıdakı səfirliyindən yaydığı məlumatda qeyd olunub./azvision.az