İran 40 illik borcunu Böyük Britaniyadan tələb edir

09.10.2019 15:04

Məhkəmə qərarının olmasına baxmayaraq, Böyük Britaniya İrana borcunu ödəmək istəmir. Bu, beynəlxalq qanunlara ziddir.

Bu sözləri İranın Böyük Britaniyadakı səfiri Həmid Bəninecad deyib.

O, rəsmi Londonu tənqid edərək qeyd edib ki, Böyük Britaniya Ali Məhkəməsi İranın müraciəti əsasında işə baxıb və borcun ödəniləsi barədə qərar qəbul edib. Lakin Böyük Britaniya hökuməti müxtəlif bəhanələrlə borcu ödəməkdən boyun qaçırır.

Məsələnin mahiyyəti ondan ibarətdir ki, 40 il əvvəl - hələ şah rejimi dövründə İran "Çiften” tanklarının alınmasına dair Böyük Britaniya ilə saziş imzalayıb. Lakin 1979-cu ildə İranda baş verən inqilabdan sonra şah rejimi devrildi və hakimiyyət dəyişikliyi baş verdi. Rəsmi London müqavilədə nəzərdə tulduğu kimi, bir neçə milyon dollar məbləğində beh alsa da, İrana qarşı sanksiyaları bəhanə gətirərək üzərinə düşən öhdəliyi yerinə yetirməkdən imtina edir.

Bu gün həmin tanklar artıq çox köhnəlib və İran ordusunun tələblərinə cavab vermir. İran öz ordusu üçün nəinki daha modern tanklar alıb, hətta özü tank istehsal etməyə başlayıb. Ona görə də İran Böyük Britaniya Ali Məhkəməsinə müraciət edərək hüquqlarının təmin olunmasını tələb edib. Uzun sürən prosesdən sonra 2012-ci ildə məhkəmə Böyük Britaniyanın İrana 480 milyon dollar məbləğində təzminat ödəməsi barədə qərar qəbul edib. Lakin aradan yeddi il keçməsinə baxmayaraq, rəsmi London sanksiyaları əsas gətirərək borcu ödəmir. İran hüquqşünasları məhkəmədə sübut ediblər ki, bu borcun ödənilməsinin sanksiyalara heç bir dəxli yoxdur. İran tərəfi hüquqlarının bərpası üçün fəaliyyəti davam etdirəcəyini bildirir. (AZƏRTAC)

© xezerxeber.az


69 dəfə oxunub

XƏBƏRLƏR

ÇOX OXUNANLAR