İbrahim Kalın: “Türkiyə hər zaman Azərbaycanladır”

"Türkiyə onsuz da Azərbaycanladır və hər zaman da olacaq. Müşahidə qüvvələrinin bir hissəsi kimi də Türkiyə Azərbaycanda olacaq”.

Xezerxeber.az-ın xəbərinə görə, bunu Türkiyə Prezidentinin sözçüsü İbrahim Kalın NTV telekanalına müsahibəsində bildirib.

İ.Kalın Qarabağ məsələsilə bağlı Türkiyəyə qarşı irəli sürülən ittihamlarla razılaşmadığını, ölkəsinin Qarabağda olmasının Avropa üçün də faydalı olacağını vurğulayıb: "Ruslar önə çıxdı və atəşkəs üçün bir razılaşma əldə olundu. Rusiya hərbçiləri orada 5+5 il qalacaqlar. Mən də bunu deyirəm: Madam rus hərbçilərinin orada varlığından narahatsınız, nədən bu günə qədər müttəfiq olaraq gördüyünüz Ermənistana oradakı rus hərbi bazalarını çıxarılmasını söyləmədiniz? Buna gücünüz çatırsa, buyurun edin, Ermənistan oradakı rus hərbiçilərini çıxarsın. Ruslar Qafqaza və ya Ermənistana yeni gəlmədi, illərlədir ki, oradadırlar. ABŞ atəşkəs üçün bir fəaliyyətə başladı, bizdən də dəstək istədilər, biz də dəstək olduq. Atəşkəs iki gün çəkdi. Bundan başqa, məsələn, Fransadan hansısa bir təklif gəldimi? Avropa, NATO və ya Avropa İttifaqından hansı dəyərli bir təklif verildi ki, biz onu rədd etdik? Amma Rusiya ilə 30 illik münaqişəni müzakirə edib, savaşı sonlandıracaq razılaşma əldə etdik. İndi türk əsgərləri də müşahidəçi qüvvə qismində orada olacaq. Bu Qərb və Avropa üçün də strateji mənfəət olaraq qəbul edilməlidir. Qarabağda, Liviyada, Suriyada Türkiyənin olması Avropa İttifaqı üçün də faydalıdır”.

İ. Kalın deyib ki, Qarabağda Rusiya-Türkiyə Birgə Monitorinq Mərkəzinin fəaliyyətilə bağlı Rusiya tərəfi Türkiyə ilə Ankarada fikir mübadiləsi aparıb, hazırda isə Kremldə bununla əlaqədar müzakirələr davam edir: "Hərbçilərimiz, müdafiə, xarici işlər nazirlərimiz və milli təhlükəsizlik qüvvələrimiz bu məsələlərə birgə nəzarət edir. Önümüzdəki günlərdə əməliyyat prosedurları, kimin hansı işi görəcəyi və bunların harada və necə olacağı ilə bağlı danışıqların nəticələrini gözləyirik. Türk əsgərləri onsuz da orada olacaq. Azərbaycanla qardaş münasibətlərimizə görə hərbi hazırlığımız və əməkdaşlıq müqavilələrimiz çox qədimdir. Müşahidə qüvvələrinin bir hissəsi kimi Türkiyə hərbçilərinin Azərbaycanda olmasına dair qanun layihəsi də qəbul edildi”.