Azərbaycanda "Facebook" istifadəçilərinin fəallığı artıb

Bu ilin mart ayında Azərbaycanda "Facebook" istifadəçilərinin fəallığı fevral ayı ilə müqayisədə 1,55 faiz bəndi artıb.

"APA-Economics"in "Global Stats" statistika mərkəzinə istinadən verdiyi məlumata görə, aprelin 1-nə "Facebook"un Azərbaycanın sosial media bazarında payı 36,1% təşkil edib ki, bu da ötən ilin müvafiq göstəricisindən 3 faiz bəndi azdır. Populyarlığına görə "Facebook" ölkənin sosial media bazarında birinci yeri tutur.

Sosial şəbəkələr arasında populyarlığına görə ikinci yerdə "Instagram" qərarlaşıb ki, onun istifadəçilərinin ölkə üzrə fəallığı mart ayı ərzində 3,3 faiz bəndi artıb. Bu sosial şəbəkənin Azərbaycan bazarında payı bu ilin aprelin 1-nə 22,7% təşkil edib ki, bu da ötən ilin analoji göstəricisindən təqribən 11,8 faiz bəndi çoxdur.