“ASAN xidmət”ə 26 milyonuncu vətəndaş müraciəti qeydə alındı

Dekabrın 25-də "ASAN xidmət”ə 26 milyonuncu vətəndaş müraciəti qeydə alınıb.

AZƏRTAC-ın bölgə müxbiri xəbər verir ki, bu müraciət Şəki "ASAN xidmət” mərkəzinə Şəki şəhər sakini Nadir Paşayev tərəfindən edilib. O, Ədliyyə Nazirliyi tərəfindən həyata keçirilən vətəndaşlıq vəziyyəti aktlarının dövlət qeydiyyatı xidmətindən yararlanıb.

26 milyonuncu müraciətin sahibi Nadir Paşayev təşəkkürnamə və hədiyyələrlə mükafatlandırılıb.

"ASAN xidmət”in ictimaiyyətlə əlaqələr şöbəsinin müdiri Elnur Niftəliyevin verdiyi məlumata görə, hazırda 15 "ASAN xidmət” mərkəzi fəaliyyət göstərir. Onlardan 5-i paytaxt Bakı şəhərində, digərləri Sumqayıt, Gəncə, Sabirabad, Bərdə, Qəbələ, Masallı, Quba, Mingəçevir, İmişli və Şəkidədir. Bundan əlavə, regionlarda 10 Səyyar "ASAN xidmət” avtobusu və Səyyar "ASAN qatar” vasitəsilə vətəndaşlara səyyar formada xidmətlər göstərilir.