Xəzər Xəbər

İş axtaranlar üçün xəbər var

Cəmiyyət | 12:46 • 27 Avqust 2018
İş axtaranlar üçün xəbər var

Dövlət İmtahan Mərkəzi tərəfindən 2018-ci il avqustun 27-də dövlət orqanlarında A və B növünə aid dövlət qulluğu vəzifələrinin tutulması üçün ümumi müsahibə elan edilib.

Qurumdan Trend-ə verilən məlumata görə, elana çıxarılan vəzifələr mərkəzi icra hakimiyyəti orqanlarının aparatlarında və onların tabeliyində olan qurumlarda, yerli bölmələrdə, həmçinin məhkəmə orqanlarında olmaqla 8-i dövlət qulluğu vəzifələrinin A növü (inzibati rəhbər), 23-ü isə B növü vəzifələrinə (inzibati icraçı) aiddir.

Ümumi müsahibəyə çıxarılan vəzifələr arasında ən yüksək vəzifələr inzibati vəzifələrin 4‑cü təsnifatına uyğun olan Qida Təhlükəsizliyi Agentliyində şöbə müdirinin müavini və inzibati vəzifələrin 5-ci təsnifatına uyğun sektor müdiri vəzifələridir. Ümumilikdə isə, Qida Təhlükəsizliyi Agentliyində 12 vəzifə, Ailə, Qadın və Uşaq Problemləri üzrə Dövlət Komitəsində 2 vəzifə, Gənclər və İdman Nazirliyində 2 vəzifə, Qaçqınların və Məcburi Köçkünlərin İşləri üzrə Dövlət Komitəsində 1 vəzifə, Bakı Apelyasiya Məhkəməsində 12 vəzifə və Maliyyə Nazirliyində 2 vəzifə olmaqla 31 vakant vəzifə elana çıxarılıb.

Ümumi müsahibə üzrə sənəd qəbulunun təkmilləşdirilməsi, vətəndaşların rahatlığının təmin edilməsi, vətəndaşların vaxt itkisinin və maliyyə xərclərinin qarşısının alınması məqsədilə Dövlət İmtahan Mərkəzi tərəfindən ümumi müsahibə üzrə sənəd qəbulu elektronlaşdırılıb. Təqdim edilən sənədlər dövlət orqanları tərəfindən aparılan elektron informasiya ehtiyatları əsasında yoxlanılır. Elektron qaydada daxil edilmiş məlumatların və sənədlərin düzgünlüyünün elektron informasiya ehtiyatları əsasında yoxlanılması mümkün olmadığı halda, Mərkəzin tələbi əsasında müvafiq sənədlərin müəyyən edilmiş qaydada təsdiq olunmuş surətləri və ya eyniləşdirmə məqsədi ilə həmin sənədlərin əsilləri Mərkəzə təqdim edilməlidir.

Ümumi müsahibədə iştirak etmək istəyən namizədlər "Dövlət qulluğu üzrə müraciət Forması” vasitəsilə 27 avqust 2018-ci il tarixindən 27 sentyabr 2018-ci il saat 18:00-dək (30 gün müddətində) Mərkəzin internet portalına məlumatları daxil edərək qeydiyyatdan keçməlidir.

Xəbər lenti