Ötən il Azərbaycanda 638 insan böyrək çatışmazlığından ölüb

"Hazırda Azərbaycanda 3406 xəstə böyrək çatışmazlığı diaqnozu ilə qeydiyyatdadır".

Bunu M.C.Cavadzadə adına Respublika Klinik Uroloji Xəstəxanasının hemodializ şöbəsinin müdiri Fariz Babayev deyib.

Onun sözlərinə görə, xəstələrdən 1922 nəfəri kişi, 1484 nəfəri isə qadındır: "Xəstələrin 2022 nəfəri regionların, 1384 nəfəri isə Bakının payına düşür. xəstələrdən ən balacasının 6 yaşı, ən böyüyün isə 84 yaşı var".

Şöbə müdiri əlavə edib ki, ölkədə ötən il 1226 yeni xəstə aşkar olunaraq hemodializ müalicəsi alır: "Onlardan 527-si Bakının, 799-u isə regiondan olan xəstələrdir. Keçən il ölkədə böyrək çatışmazlığı ilə bağlı 638 ölüm faktı qeydə alınıb. Bunun da 392-si region, 246-sı isə Bakının payına düşüb. 2016-cı ildə ölüm göstəricisi 20,2 % təşkil edirdisə, bu rəqəm keçən il üçün 18,6 %-ə düşüb".

F.Babayev qeyd edib ki, bu günə qədər 758 xəstəyə böyrək köçürülüb: "Keçən il isə 78 xəstəyə bu əməliyyat icra olunub. Böyrək xəstəliyi Azərbaycanda əsasən rütubətli və Qərb rayonlarında daha geniş yayılıb. Əhali kütləsinim həmin ərazilərdə çox olması bu xəstəliyin sayının artmasına səbəb olur. Böyrək xəstəliyinin əmələ gəlməsində nəinki qazanılmış böyrək iltihabı, eləcə də daş, hər hansı immunoloji problemlər, irsi genetik xəstəliklər də böyrək çatışmazlığı ilə fəsadlaşa bilir". (Report)