Məlumatlara görə, Bakıətrafı qəsəbələrə elektrik qatarlarının bərpa edilməsi istiqamətində işlər aparılır. Abşeron və şəhərətrafı qəsəbələrə gedən elektrik qatarlarının relsləri bərpa olunur. Yaxın gələcəkdə eletrik qatarlarının işə düşməsi gözlənilir.
Qeyd edək ki, Milli Məclisin noyabrın 22-də keçirilən iclasında
deputat Çingiz Qənizadə Bakıda tıxacların aradan qaldırılması üçün
elektrik qatarlarının bərpa edilməsinin vacibliyini qeyd edib. Deputat
bildirib ki, elektrik qatarlarının bərpası həm də ekoloji durumun
yaxşılaşmasına səbəb olacaq. Ç.Qənizadə hesab edir ki, elektrik
qatarlarının bərpası turizmin inkişafına da müsbət təsir göstərə bilər.
Ekspertlər də təşəbbüsü günün tələbi kimi dəyərləndirirlər. Belə ki,
elektrik qatarları ictimai nəqliyyatda yaşanan problemlərin həllinə
kömək etmiş olacaq. Yollardakı sıxlığı aradan qaldırmaqla yanaşı, ucuz
və ekoloji baxımındna sərfəli nəqliyyat növü hesab olunur.
Nəqliyyat məsələləri üzrə ekspert Azər Allahverənov bildirdi ki, indiki
parametrlərə görə elektrik qatarlarının bərpası sərfəli olardı: "Həm
ucuz nəqliyyat növüdür, həm də vaxt itkisi olmur. Bundan başqa,
Bakıətrafı qəsəbələrə gedən nəqliyyat axınını bir qədər azaltmış olar.
Bunlarla yanaşı, ekoloji baxımdan da sərfəlidir. Nəzərə alaq ki,
dünyanın inkişaf etmiş ölkələrində də elektrik qatarlarından,
tramvaylardan geniş istifadə olunur. Elektrik qatarları vaxtı ilə Bakıda
da fəaliyyət göstərib. İndi də bir çox parametrlərinə görə uğurlu
layihə olardı. Əgər müasir texnologiyalar tətbiq ediləcəksə, bu, həmin
nəqliyyat növündən istifadə edənlərin sayının kəskin artmasına gətirib
çıxaracaq.
Əvvəllər Bakıətrafı qəsəbələrdə əsasən bağ evlərinə gedən insanlar idi.
İndi isə şəhərimiz böyüyüb, qəsəbələrə hansısa fəsildə gedilmir. Artıq
Bakıətrafı ərazilərdə ilboyu yaşayış formalaşıb. Belə vəziyyətdə
elektrik qatarlarının bərpası uğurlu, insanların maraqlarına cavab verən
təşəbbüs olardı”.