"Yol hərəkəti təhlükəsizliyinin təmin olunmasına ictimai dəstək" adlı layihənin icrasına başlanılıb.
XəzərXəbər milli.az-a istinadən bildirir ki, əsasən, yol hərəkəti iştirakçıları olan piyadaların, sürücülərin və ictimai nəqliyyatdan istifadə edən sərnişinlərin, habelə məktəb yaşlı uşaqların, yeniyetmə və gənclərin yol hərəkəti qaydaları və ictimai nəqliyyatdan təhlükəsiz istifadə olunması ilə bağlı maarifləndirici işlərin həyata keçirilməsini nəzərdə tutan layihə iki istiqamətdə - yol hərəkəti iştirakçıları və ictimai nəqliyyatdan istifadə edən sərnişinlər arasında reallaşdırılacaq.
Layihənin müəllifi İlhamə Qurbanova bildirib ki, layihə çərçivəsində keçiriləcək tədbirlərdə piyada, sürücü və sərnişinlərin maarifləndirilməsi və məktəblərdə şagirdlərlə görüşlərin təşkili, balacaların ictimai nəqliyyatdan istifadə qaydaları ilə bağlı maarifləndirilməsi və onlara davranış qaydalarının aşılanması nəzərdə tutulur.
Onun sözlərinə görə, layihədən əsas məqsədi ictimai nəqliyyat vasitələrinin sürücülərini daha məsuliyyətli və cəmiyyətə qarşı daha qayğıkeş olmağa səsləmək, piyadaların və sərnişinlərin yol hərəkəti təhlükəsizliyi qaydaları ilə bağlı məlumatlılıq səviyyəsini yüksəltmək, piyadaları özlərinin və başqalarının təhlükəsizliyi məqsədilə daha məsuliyyətli olmağa çağırmaq, ictimai nəqliyyatdan istifadə edən sərnişinlərə öz ictimai və vətəndaş öhdəlikləri və hüquqları, habelə avtobus sürücüləri tərəfindən qayda pozuntusu və sərnişinlərə qarşı hörmətsizlik halları ilə qarşılaşan zaman müraciət etməli olduqları qurumlar haqqında məlumat vermək, orta məktəblərdə təhsil alan uşaq və yeniyetmələrin yol təhlükəsizliyi qaydaları ilə bağlı məlumatlılığını artırmaqdır.
Qeyd edək ki, 3 ay davam edəcək layihənin birinci istiqaməti üzrə Bakı şəhərinin mərkəzi ərazilərində ictimai reydlər keçiriləcək. İkinci istiqamət üzrə fəaliyyətlər paytaxtın mərkəzi və ətraf qəsəbələrində fəaliyyət göstərən məktəblərdə reallaşdırılacaq. Sonuncu - üçüncü mərhələdə isə işçi qrupun, KİV-in, tərəfdaş dövlət qurumlarının və geniş ictimaiyyətin iştirakı ilə maarifləndirici tədbir keçiriləcək. Tədbirdə yol hərəkəti təhlükəsizliyi sahəsində mövcud olan problemlər, onların həlli perspektivləri, əldə olunan nəticələr və ictimai sektorun dövlətin bu sahədə həyata keçirdiyi tədbirlərə töhfəsi müzakirə olunacaq. Eyni zamanda, layihə ilə bağlı sosial şəbəkələrdə aktiv fəaliyyət təşkil olunacaq.
"Beləliklə, biz əsas yol hərəkəti iştirakçıları olan piyadalar və ictimai nəqliyyatdan istifadə edən sərnişinlər və ictimai nəqliyyat vasitələrinin sürücüləri, habelə cəmiyyətimizin və ölkəmizin gələcəyi olan uşaqları qorumaq məqsədilə bu tədbirlərin keçirilməsində qətiyyət nümayiş etdirmək niyyətindəyik," - deyə İ.Qurbanova bildirib.
Qeyd edək ki, layihə Azərbaycan Respublikası Prezidenti yanında Qeyri Hökumət Təşkilatlarına Dövlət Dəstəyi Şurasının dəstəyi ilə "Ailə və Ətraf Mühit" İctimai Birliyi tərəfindən gerçəkləşəcək.
