Temperatur ötən günlərlə müqayisədə 2-3 dərəcə artacaq

Artıq bir neçə gündür ki, paytaxtda, eləcə də bölgələrdə temperaturun aşağı enməsi, yağıntılı və tutqun hava şəraiti müşahidə olunur. Ölkə ərazisində avqustun 18-i günortadan etibarən havanın mülayimləşəcəyi, yağıntıların tədricən kəsiləcəyi gözlənilir. Bakıda və Abşeron yarımadasında mülayim cənub-şərq, bölgələrdə zəif şərq küləyi əsəcək, hava şəraiti sabitləşəcək.

Həftəsonu, eləcə də gələn həftənin ilk iş günlərində hava şəraiti sabit olacaq, əsasən yağmursuz keçəcək, havanın hərarəti ötən günlərlə müqayisədə tədricən 2-3° artacaq.

Bu barədə AZƏRTAC-a Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun direktor əvəzi Gülşad Məmmədova məlumat verib.

G.Məmmədova, həmçinin bildirib ki, Bakıda və Abşeron yarımadasında havanın hərarəti 32-37°, bölgələrdə 38°, dağlıq ərazilərdə 27-32° isti təşkil edəcək. Bakıda və Abşeron yarımadasında gündüz cənub-şərq küləyi əsəcək, bir qədər rütubətli hava şəraiti müşahidə ediləcək ki, bu da əksər meteohəssas insanlar üçün diskomfort hissi yarada bilər.